Gelukkig, ne ni-j jaor! Ne jaor is weer veurbi-j. Veur iedereene ne jaor met zien eigen hoogte en deepte punten. Ai-j de media mûkt geleuven dan hew ne reurig jaor achter ons, maor dat geldt denk ik veur ieder jaor. De economische crisis hef ’t ni-js beheerst. Wi-j bunt weer terecht e kommene in zwaor weer. “Ai-j maor neet zeek wordt of bi-j huus komt te zitten dan is der neet zo völle an de hand” zekt der ne hoop. Maor ai-j now wal zeek wordt of ai-j now wal bi-j huus loopt wat dan? Wee kump ow dan te gemoot? Daor hew ‘t afgelopen jaor modern naoberschap veur uut e vondene, daor hebt der ook al ne hoop leu over e schrévene, maor wat is dat modern naoberschap? En wat is dan olderwets naoberschap want dat zal dan ok wal bestaon hebben. En is modern naoberschap alleene ne oplossing veur moderne problemen? Of ok veur problemen van alle tied?
Ut afgelopen jaor hebbe wi-j as bestuur ons drok e maakt veur ne AED waor gebroek van e maakt kan worden at der nood an de man of vrouw is. Neet alleene veur in ‘t Romienendal maor ok daor buten. Hierveur is het belangriek dat mensen zich vri-jwillig wilt inzetten um in geval van ne accuute hartstilstand de hande uut de mouwen te steken en in actie te kommen. Want hoe eerder i-j ne slachtoffer kunt helpen de baeter ut aflöp. Op de website van ’t Romienedal kui-j zeene ho i-j ow hierveur op kunt gevven en wat der van ow verwacht wordt. Misschien is dit wal ne veurbeeld van modern naoberschap? Ne ni-j jaor ligt veur ons, veur völle van ons ne moment um ut olde jaor achter zich te laoten en met goeien mood en deftige veurnemmens ut ni-je jaor te beginnen. Um ze waor te maken, das nog neet zo nevoudig, maor daor hew ne heel jaor de tied veur. Ik heuren op de radio daw rekening moet hollen met kortingen op d’n oldendagveurziening en nog völle slimmer daw volgens de maya’s ut jaor neet ens tot ne good ende gaot brengen.
Völle van dizze problemen daor köw neet wat an doone, wi-j mot maor zeene wat de tied breg. Maor wat dichter bi-j huus daor köw wal degelijk wat betekenen veur mekare. Lo-w ok dit jaor weer naor mekare umme zeene. Lo-w mekare weer opzeuken in moeilijke momenten maor zeker ok wanneer der iets te vieren is of maorzo, effen langs. Hier in ’t Romienendal is daor vaak gelegenheid genog veur, zo hef iedereene zien reden um te kommen. Ik hoppe daw mekare ok dit jaor weer regelmaotig zult treffen. Want at ut um ons hen kold en slecht is, is der niks zo fijn um samen effen bi-j mekare te waen.
No gaow allemaole met frissen mood ut ni-je jaor weer in en straks at 2012 op ne entjen löp, ut bliekt dat de maya’s zich veraekend hebt en 2013 veur de deure steet, dan denke wi-j allemaole: Gelukig, ne ni-j jaor! Gelukkig ni-j jaor!